अर्थ संवाद 
नेपाल र युएई भिड्दै
आईसीसी विश्वकप क्रिकेट लिग टु अन्तर्गत त्रिकोणत्मक सिरिजको अन्तिम खेलमा घरेलु टोली नेपालले आज युएईको सामना गर्दैछ । पाहुना टोली युएईसँगको खेल आज बिहान साढे ९ बजेबाट कीतिपुरमा शुरु हुनेछ । २०१९ बाट शुरु विश्वकप लिग टु सिरिजको समेत यो अन्तिम खेल हो । घरेलु टोली नेपाल जित निकाल्दै जिम्बाबेमा आयोजना हुने विश्वकप छनोट खेल्ने योजनमा रहेको छ । यही त्रिकोणत्मक सिरिज अन्तर्गतको पहिलो खेलमा नेपालले युएईलाई १ सय ७७ रनको कीर्तिमानी जित हाँसिल गरेको थियो । नेपाल आज पनि त्यही लय दोहोर्याउने लक्ष्यमा रहेको छ । नेपालले लिग टू का पछिल्ला ११ खेलमा १० जित हात पारेको छ ।
ए डिभिजन लिगः आज दुई खेल
शहीद स्मारक ए डिभिजन लिग फुटबल प्रतियोगितामा आज दुई खेल हुँदैछन् । एक खेल च्यासल मैदान र एक खेल एन्फा कम्प्लेक्समा हुनेछ । दुवै खेल दिउँसो २ः३० बजेबाट शुरु हुनेछन् । च्यासलमा हुने खेलमा एफसी खुमलटार र सातदोबाटो युथ क्लवबीच प्रतिष्पर्धा हुनेछ । यस्तै एन्फा कम्प्लेक्समा हिमालयन शेर्पा क्लव र संकटा क्लवबीच प्रतिष्पर्धा हुनेछ ।
सभामुख घिमिरेको पत्रकार सम्मेलन
सभामुद देवराज घिमिरे आज स्वदेश फर्किंदै हुनुहुन्छ । अन्तरव्यवस्थापिका सङ्घ (आईपीयु) को १४६औँ महासभामा सहभागी भई उहाँ आज स्वदेश फर्किन लाग्नुभएको हो । उहाँ आज साँझ ६ बजे त्रिभुवन अन्तर्राष्ट्रिय विमानस्थल हुँदै आउने कार्यक्रम रहेको छ ।
निफको उद्घाटनमा प्रधानमन्त्री
आजबाट छैटौं नेपाल अन्तर्राष्ट्रिय चलचित्र महोत्सव (निफ) शुरु हुँदै५ । चैत्र २ गतेदेखि ६ गतेसम्म सञ्चालन हुने छैटौं नेपाल अन्तर्राष्ट्रिय चलचित्र महोत्सव (निफ) आज प्रधानमन्त्री पुष्पकमल दाहालले शुभारम्भ गर्नुहुनेछ । कार्यक्रमको शुभारम्भ आज दिउँसो ३ बजे सिभिल मलमा हुनेछ । समापन संस्कृति, पर्यटन तथा नागरिक उड्डयनमन्त्री सुदन किराँतीबाट हुने आयोजकले बताएको छ । ५५ देशबाट आएका ५ सय बढी चलचित्र मध्येबाट ३५ देशका ९५ चलचित्र प्रतियोगिताका लागि छनोट भएको आयोजकले बतायो । यी चलचित्रको प्रदर्शन चार वटा काठमाडौंका अत्याधुनिक सिनेमा हलहरु सिभिल मल, छायाँ सेन्टर, पुलचोकको लविङ मल, भक्तपुरको राधेराधेको भाटभटेनीमा रहेको हलबाट प्रदर्शन हुनेछ । ओपनिङ फिल्मको रुपमा कोरिन शर्मा निर्देशित चलचित्र चरी प्रदर्शन हुनेछ । उल्लेखित सिनेमा हलहरुमा खल्ती एपबाट टिकट बुकिङ गर्न सकिनेछ । यसपटक सात विधामा १४ वटा पुरस्कार वितरण गरिने बताइएको छ ।
१० दलीय गठबन्धनको बैठक बस्दै
आज १० दलीय गठबन्धनको बैठक बस्दैछ । बैठक प्रधानमन्त्रीको सरकारी निवास बालुवाटारमा बस्नेछ । यद्यपी बैठकको समय भने निर्धारण गरि सकिएको छैन । गठबन्धनबाट उपराष्ट्रपतिको उम्मेदवार जनता समाजवादी पार्टी, नेपालका रामसहायप्रसाद यादव र जनमत पार्टीकी ममता झा रहनुभएको छ । दुई उम्मेदवारमध्ये एकलाई गठबन्धनको साझा उम्मेदवार बनाउनका लागि दलहरू समझदारी खोजिरहेका छन् । तर सफल हुन सकेका छैनन् । आजको बैठकमा पनि उपराष्ट्रपति निर्वाचन र सरकार बिस्तारबारे छलफल हुनेछ ।
जसपा केन्द्रिय कार्यकारिणी समितिको बैठक बस्दै
आज जनता समाजवादी पार्टी, नेपालको केन्द्रिय कार्यकारिणी समितिको बैठक बस्दैछ । बैठक बिहान ११ बजे पार्टी केन्द्रिय कार्यालयमा बस्नेछ । आजको बैठकमा समानुपातिक सांसदबारे निर्णय गर्ने बताइएको छ । जसपाकी शहनाज रहमानको निधन भएपछि प्रतिनिधि सभा तर्फको एक स्थान रिक्त छ । मुस्लिम क्लस्टरको दोस्रो स्थानमा मञ्जु अन्सारी रहनुभएको छ ।
आजको मौसम
गण्डकी, लुम्बिनी, कर्णाली र सुदूरपश्चिम प्रदेश लगायत देशका पहाडी भू–भागमा आंशिकदेखि सामान्य बदली रही बाँकी भू–भागहरूमा आंशिक बदलीदेखि मौसम सामान्यतया सफा रहेको छ । आज दिउँसो देशभर आंशिकदेखि सामान्य बदली रहनेछ । देशको पहाडी भू–भागका थोरै स्थानहरू तथा तराई भू–भागका एक–दुई स्थानमा अपरान्हतिर मेघ गर्जन चट्याङसहित क्षणिक÷हल्कादेखि मध्यम वर्षाको सम्भावना रहेको छ । आज राति देशको पहाडी भू–भागहरूमा आंशिकदेखि सामान्य बदली तथा बाँकी भू–भागमा आंशिक बदलीदेखि मौसम सामान्यतया सफा रहनेछ । देशका पहाडी भू–भागका थोरै स्थानहरूमा मेघ गर्जन÷चट्याङसहित क्षणिक हल्का वर्षाको सम्भावना रहेको छ ।
